Hello，大家好，我哋係由韓國人每日提供最新韓國旅行資訊嘅Creatrip。
韓國最近超興做Personal Colour Test（個人色彩診斷），透過搵出同我哋膚色最夾嘅顏色，改變自己衣著、化妝品、髮色等等去令成個人睇落更加亮麗動人！今日就等小編介紹一個有提供中文同英文翻譯服務嘅Personal Colour中心俾大家啦！
聖水「DAMPPEUM」資訊
- 地址：서울 성동구 아차산로 54 3F
- 營業時間：11:00 - 20:00
聖水「DAMPPEUM」介紹
今日小編嚟到「DAMPPEUM」聖水店做Personal Colour測試！「DAMPPEUM」聖水店位於纛島站徒步5分鐘距離，非常方便！
入到去首先要換拖鞋。
鋪頭雖然唔大，總共有3間諮詢室，不過因為呢度嘅裝修以白色為主調，所以俾人感覺非常乾淨同開揚！
呢度更加有一個打卡位，大家做完診斷之後可以嚟影相打卡！
職員會事先根據預約人數準備好所需物資。
枱嘅右邊放滿各種唇膏唇彩~
房入面亦都掛有五顔六色嘅布，勁colourful~
然後下面就有齊做個人色彩診斷嘅時候會用到嘅布，真係好想快啲知道自己到底屬於邊種色調啊！
正式開始之前，首先要填一張問卷，內容主要圍繞住大家平時鍾意/唔鍾意著咩顔色嘅衫，有啲咩想知道等等。
專家會根據呢張問卷幫大家分析，問卷答案寫得越詳細，專家就可以更加有效咁幫大家進行診斷，所以建議大家可以事先查清楚平時自己用開咩色號嘅化妝品~
專家之後就會先解釋Personal Colour嘅原理，大家知道各種色調有咩分別之後，就可以更加瞭解自己嘅結果，之後無論係買衫定化妝品都可以輕鬆揀色！
專家會首先分析你嘅頭髮顔色，然後幫大家用白布遮住頭髮同衫，再進行膚色分析（咁測出嚟個結果會更加準！），跟住就會推薦啱你嘅粉底色號。
Warm同Cool Tone分別有兩個季節，不過每款色調會再細分成三個類別，聽落好複雜，不過專家都解釋得好仔細，小編個人覺得幾fun~
專家之後會話俾你知邊幾款顔色最襯你、邊幾款顔色最唔襯你，大家之後就可以根據專家嘅意見去買衫啦！
而一齊去嘅朋友嘅結果同小編完全相反！本身以為皮膚白啲就係Cool Tone、黃啲就係Warm Tone，做完呢個Test之後先發現原來唔係咁。
之後專家就會叫大家show啲平時用開嘅化妝品俾佢睇，然後根據診斷結果推薦更加襯你嘅顔色俾你！
因為小編今次揀咗高級個人色彩診斷，所以呢度未係最後！
專家幫小編同朋友各自推薦咗2款唇部產品，搽完之後又真係會令人睇落更加有朝氣，證明Personal Colour係真係work㗎！
之後專家就幫小編同朋友寫咗份診斷書，入面會寫住推薦你染咩髮色，仲有推薦嘅眼影、唇膏、粉底等等，非常仔細！
專家亦都會幫大家睇啱戴咩色嘅飾物，好似小編咁，比起金色或者玫瑰金會適合帶銀色系嘅飾物多啲！
高級個人色彩診斷最後一個服務就係體型診斷啦！相信好多朋友都會想知道自己啱著咩版型嘅衫，專家會根據你嘅頸部長度、肩寬、腰圍、盆骨、腿長等等幫你分析你嘅體型。
例如小編就被診斷為沙漏型，專家仲會根據體型推薦你做邊款運動改善體態，勁detail！
除此之外，上身同下身啱著咩style，你嘅Personal Colour俾人咩印象，要點襯衫等等一次過都會話你知！
成個過程大概用咗2個鐘，解釋夠詳盡，而且仲有其他Personal Colour中心冇提供嘅服務，小編個人非常滿足，亦都好推薦大家嚟體驗~
聖水「DAMPPEUM」前往方法
DAMPPEUM聖水店
喺纛島站（뚝섬역）5號出口出。
直行。
行大約100m，望向右手邊會見到「DAMPPEUM」嘅招牌。
行入大廈上3樓。
咁就去到啦！
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
